Monthly Archives: August 2016

ഇന്‍സ്പെക്ഷന്‍

നാടുവിട്ട് കര്‍ണ്ണാലിലെ നവോദയാ വിദ്യാലയത്തിലെത്തി ഇത് അഞ്ചാം അധ്യയനവര്‍ഷം.  ‘റോമില്‍ ചെന്നാല്‍ റോമാക്കാരനാകണം’ എന്ന പൂര്‍ണ്ണബോധ്യത്തോടെ തനി ‘ഹരിയാന്‍വി’യായി മാറാന്‍ മനസ്സുകൊണ്ടും വാക്കുകൊണ്ടും നീണ്ടുകിടക്കുന്ന കഴിഞ്ഞ നാലുവര്‍ഷങ്ങളില്‍ ശ്രമിച്ചിരുന്നു എന്നാണെന്‍റെ ‘മേനി’.  മനസാ വാചാ കര്‍മ്മണാ മലയാളിത്തം വിട്ടുമാറാത്ത അവസ്ഥയിലും അവിടത്തെ ആളുകളെപ്പോലെ ജീവിക്കാന്‍ തയ്യാറാവുന്ന ഒരു മറുനാടന്‍ മലയാളിയുടെ  തന്മയത്വത്തോടെ, ഈ  ഞാനും!

കഴിഞ്ഞ നാല് വര്‍ഷവും ‘ആന്വല്‍ പാനല്‍ ഇന്‍സ്പെക്ഷന്’ ഞാനും കൂടെയുള്ള അധ്യാപരോടോത്ത് ക്ലാസെടുത്തു കാണിക്കാന്‍ വ്യഗ്രത പൂണ്ടിരുന്നു. അതില്‍ ഒരു വര്‍ഷം മാത്രം നാട്ടിലെപ്പോലെ കുട്ടികളെ പഠിപ്പിക്കാന്‍ സാധിച്ചു.  ആ വര്‍ഷം ഹരിയാണയിലെ ഭിവാനി ജില്ലയിലെ പ്രിന്‍സിപ്പാള്‍ മലയാളിയായ പുഷ്ക്കരന്‍ സാറാണ് വന്നിരുന്നത്.  ‘മൈഗ്രേഷ’ നു തിരുവനന്തപുരത്തു നിന്നും വന്ന കുട്ടികളെ അദ്ദേഹത്തിനു മുന്‍പില്‍ പഠിപ്പിക്കുമ്പോള്‍ ഏറെ സംതൃപ്തിയുണ്ടായിരുന്നു.  മറ്റു മൂന്നു വര്‍ഷങ്ങളില്‍ അതിനായി ഞാന്‍ കാത്തു സൂക്ഷിച്ചു വെച്ചിരുന്നത് കവി ഓ എന്‍ വി കുറുപ്പിന്‍റെ ‘കുഞ്ഞേടത്തി’ എന്ന കവിതയിലെ ഏതാനും വരികളായിരുന്നു.  നീട്ടിപ്പാടാനും വിവരിക്കാനും സാധ്യതകള്‍ ഏറെയുള്ള ആ കവിത ഇവിടത്തുകാരായ പ്രിന്‍സിപ്പാള്‍മാരുടെ മുന്‍പില്‍ വേണ്ടപോലെ അവതരിപ്പിക്കുമ്പോഴും ഏറെ ചാരിതാര്‍ത്ഥ്യമുണ്ടാകുമായിരുന്നു.  മനുഷ്യ വികാരങ്ങള്‍ ഭാഷകള്‍ക്ക് അതീതമാണെന്നു തെളിയിക്കാന്‍ ഇതിലപ്പുറം നല്ലൊരവസരം മറ്റൊന്നില്ല എന്നെനിക്ക് തോന്നി.

ഇക്കൊല്ലം സ്കൂള്‍ തുറന്നയുടനെ ജൂലൈ മാസത്തില്‍ ഇന്‍സ്പെക്ഷന്‍ തീരുമാനിക്കപ്പെട്ടിരുന്നു.  കേരളത്തിലെപ്പോലെ മുന്‍കൂട്ടി ആസൂത്രണം ചെയ്തു ഒരു മഹാമേളയായി ആ ദിവസം ഇവിടങ്ങളില്‍ ആഘോഷിക്കാറില്ല.  തലേന്ന് രാവിലെ വിവരം പറയും, അതനുസരിച്ച്  എന്നെപ്പോലെയുള്ളവര്‍ ടീച്ചിംഗ് ഡയറിയും മറ്റു രേഖകളുമെല്ലാം തട്ടിക്കൂട്ടി പൂര്‍ത്തിയാക്കി വേണ്ടിടത്തെല്ലാം പ്രിന്‍സിപ്പാളിന്‍റെ പച്ചമഷി ചാര്‍ത്തിക്കും.  കുട്ടികളുടെ പുസ്തകങ്ങളില്‍ എല്ലാം അധ്യാപകരുടെ ചുവന്ന ‘ടിക്കുകള്‍’ കയറിക്കൂടും.  ജയ്പ്പൂര്‍ റീജ്യണല്‍ ഓഫീസില്‍ നിന്നും ഒരു അസിസ്റ്റന്റ് കമ്മീഷണറും കൂടെ പ്രിന്‍സിപ്പാള്‍മാരും ക്യാമ്പസ്സില്‍ നേരത്തെ സന്നിഹിതരാകും.

വര്‍ഷങ്ങള്‍ക്കു മുന്‍പ് സ്കൂള്‍ പഠനകാലത്ത്‌ ഇതേപോലെ സാധാരണ സര്‍ക്കാര്‍ വിദ്യാലയത്തില്‍ വന്നിരുന്ന ‘ഇന്സ്പെകടര്‍’മാരെ പേടിയോടെ വീക്ഷിച്ചിരുന്ന എന്‍റെ അധ്യാപകരെ ഞാന്‍ ഓര്‍ക്കുന്ന ദിവസമാണ്, അത്.  ഒരിയ്ക്കല്‍ ക്ലാസിലെത്തിയ ഇന്‍സ്പെക്ടറുടെ തലയ്ക്കു മുകളിലെ ചുമരില്‍ ഭൂഗോളത്തിന്‍റെ വലിയ ‘മാപ്പ്’ വിറയ്ക്കുന്ന കൈകളോടെ തൂക്കാന്‍ ശ്രമിച്ച ഞങ്ങളുടെ മാഷെ ഞാന്‍ എങ്ങനെ മറക്കാനാണ്?  പരിഭ്രമത്തോടെ അതു തൂക്കാനുള്ള ഉദ്യമം പരാജയപ്പെട്ട് ഇന്‍സ്പെക്ടറദ്ദേഹത്തിന്‍റെ മൂര്‍ദ്ധാവില്‍ വീണതും ഒരട്ടഹാസത്തോടെ അദ്ദേഹം എഴുന്നേറ്റു ചീത്ത വിളിച്ചതും ഈയ ടുത്ത ദിവസം കഴിഞ്ഞപോലെ മനസ്സിലുണ്ട്.

ഇത്തവണ വന്നവരില്‍ അസിസ്റ്റന്റ് കമ്മീഷണര്‍ക്കൊപ്പം നാലു പ്രിന്‍സിപ്പാള്‍മാരുണ്ടായിരുന്നു.  രണ്ടുപേര്‍ അടുത്തുള്ള നവോദയാ വിദ്യാലയങ്ങളില്‍ നിന്നും മറ്റു രണ്ടു പേര്‍ നഗരത്തിലെ ഇംഗ്ലീഷ്‌ മീഡിയം സ്കൂളുകളില്‍ നിന്നും വന്നിരുന്നു.  അവരെ ഉപചാരപൂര്‍വ്വം സ്വീകരിക്കാന്‍ പ്രിന്‍സിപ്പാളും വൈസ്‌ പ്രിന്‍സിപ്പാളും അധ്യാപകവൃന്ദവും സദാ സന്നദ്ധമായി മുന്നിലും പിന്നിലും ഇടതും വലതും ഉണ്ടായിരുന്നു.  അതിരാവിലെ കുട്ടികളുടെ വ്യായാമമുറകളും എട്ടുമണിക്കുള്ള അസംബ്ലിയും അവര്‍ കാണാനെത്തിയിരുന്നു.  ഈയവസരങ്ങളില്‍ എല്ലാം തന്നെ സാഹചര്യം നോക്കി കുട്ടികള്‍ നന്നായി കാര്യങ്ങള്‍ പ്രകടമാക്കിയിരുന്നു താനും.

എന്‍റെ എട്ടാം ക്ലാസിലെ മലയാളം ക്ലാസ്സ്‌ കാണാന്‍ നിയോഗിക്കപ്പെട്ടത് നഗരത്തിലെ ഇംഗ്ലീഷ്‌ മീഡിയം സ്കൂളിലെ പ്രിന്‍സിപ്പാള്‍ ശ്രീ രാജീവ്‌ ഭൂട്ടാനിയെ ആയിരുന്നു. ഒറീസയില്‍ നിന്നും ഹരിയാണയിലേയ്ക്ക് കുടിയേറിപ്പാര്‍ത്ത ഭൂട്ടാനി സാര്‍ വാക്കിലും നോക്കിലും ‘ടിക്ക്‌-ടാക്ക്‌’ ആയി തോന്നി.  ഗണിതാധ്യാപകന്നയിരുന്ന അദ്ദേഹത്തിനു മൂന്നു കണക്ക് ക്ലാസുകളും ഒരു മലയാളം ക്ലാസുമാണ് ഇന്സ്പെക്റ്റ്‌ ചെയ്യാനുണ്ടായിരുന്നത്.  നാട്ടിലെ നാലാം ക്ലാസ്സ്‌ മലയാളപാഠാവലിയിലെ കെ കെ രാജാ എഴുതിയ ‘മഴ കണ്ട കുട്ടി’ എന്ന കവിതയിലെ ഏതാനും വരികളാണ് ഇത്തവണ ഞാന്‍ പഠിപ്പിക്കാന്‍ എടുത്തത്.  അത്യുഷ്ണത്തിനിടയില്‍ ആശ്വാസമായി നന്നായി പെയ്യുന്ന മഴ.  എട്ടാം ക്ലാസിലെ ഹരിയാണക്കുട്ടികളും ഞാനും ഭൂട്ടാനി സാറിനെ കാത്ത്‌  മഴ ആസ്വദിച്ചുകൊണ്ടിരുന്നു.

അദ്ദേഹം ക്ലാസില്‍ വരുന്നതിനു മുന്‍പ് തന്നെ ഞാന്‍ കുട്ടികളോട് പലതും ചട്ടം കെട്ടിയിരുന്നു.  സാധാരണ ഉള്ളതിനേക്കാള്‍ കൂടുതല്‍ ശുദ്ധമായും വ്യക്തമായും ശക്തമായും ഒരല്‍പം നാടകീയതയോടെ പഠിപ്പിക്കാന്‍ പൊതുവേ ഞാനടക്കമുള്ള അധ്യാപകര്‍ ശ്രമിക്കാറുണ്ട്.  ആറടിയിലധികം ഉയരമുള്ള ഭൂട്ടാനി സാറിന്‍റെ മൈലാഞ്ചി മൊഞ്ചുള്ള മുടിയും ചാരനിറമുള്ള കട്ടിമീശയും വാതില്‍ക്കല്‍ പ്രത്യക്ഷപ്പെടുന്നതിന് മുന്‍പ് ഞാനെന്‍റെ കവിതാക്ലാസ്സ് തുടങ്ങിയിരുന്നു.

ആജാനബാഹുവായ അദ്ദേഹത്തെ സ്വാഗതം ചെയ്ത് ക്ലാസിലെ പിന്‍വരിയില്‍ അലങ്കരിച്ചു വെച്ച കസേരയില്‍ ഞാനിരുത്തി.  ഗൌരവം വിടാത്ത ഭാവത്തില്‍ അദ്ദേഹമാകട്ടെ എന്നെയും കുട്ടികളെയും മസ്തകം പൊക്കി മാറിമാറി നോക്കിക്കൊണ്ടേയിരുന്നു.

പൊതുവായി കവിത എന്തെന്നും ഭാവരൂപ സമന്വയത്തോടെയുള്ള അതിന്‍റെ അവതരണമെങ്ങനെ ആയിരിക്കണമെന്നും ആമുഖമായി ഞാന്‍ പറഞ്ഞു.  ഇടയ്ക്ക് ആംഗലേയകവി വില്യം വേഡ്സ്‌വര്‍ത്തിന്‍റെ കവിതാനിര്‍വ്വചനം കൂടിയായപ്പോള്‍ അദ്ദേഹം ഡയറിയില്‍ എന്തോ കുത്തിക്കുറിക്കുന്നതായി കണ്ടു.  കഴിഞ്ഞ രണ്ടുവര്‍ഷങ്ങളില്‍ കുട്ടികള്‍ പഠിച്ച കുട്ടിക്കവിതകള്‍ സാന്ദര്‍ഭികമായി ഓര്‍മ്മപ്പെടുത്തിയും ചൊല്ലിച്ചും ക്ലാസ്സ്‌ ഉത്സാഹത്തിലായി.    ‘ ടീച്ചിംഗ് എയിഡ്‌’ ആയി കയ്യില്‍ കാര്യമായി ഒന്നുമില്ലാത്ത അവസ്ഥയില്‍ ഞാന്‍ കുട്ടികളോട് പറഞ്ഞു, “ഈ കവിത പഠിപ്പിക്കാന്‍ പ്രകൃതി തന്നെ നമുക്ക് അനുകൂലമായിരിക്കുന്നു.  പുറത്ത് പെയ്യുന്ന മഴ നോക്കൂ… ഇതിലപ്പുറം ഈ കവിതയ്ക്ക് പറ്റിയ പഠനോപകരണം എന്താണുള്ളത്? ”  വീണ്ടും ഭൂട്ടാനി സാറിന്‍റെ തൂലിക ഡയറിയില്‍ ചലിക്കുന്നത് ഞാന്‍ ഒരു നിര്‍വൃതിയോടെ കണ്ടു.

രാജീവ്‌ ഭൂട്ടാനി നിര്‍ന്നിമേഷനായി എന്നെയും കുട്ടികളെയും അത്ഭുതത്തോടെ നോക്കിയിരിപ്പായിരുന്നു.  ജീവിതത്തിലാദ്യമായി മലയാളം എന്നൊരു ഭാഷ യെന്തെന്നു കണ്ടും കേട്ടും ആസ്വദിച്ചും അദ്ദേഹമിരിക്കുമ്പോള്‍ എനിക്കൊരു കാര്യം ബോധ്യപ്പെടുകയായിരുന്നു.  പ്രകൃതിയുടെ സംഗീതവും കവിതയുടെ മാധുര്യവും ലോകത്തെവിടെയും ഉള്ളവര്‍ ഒരേപോലെ അനുഭവിച്ചറിയുന്നു. ഗണിതാദ്ധ്യാപകനായ ഭൂട്ടാനി സാറിന്‍റെ ഭാവഹാവാദികളില്‍ വന്ന ഊര്‍ജ്ജം ഞാനും കുട്ടികളും ഒരേപോലെ തിരിച്ചറിഞ്ഞു.  ആംഗലേയവും ഹിന്ദുസ്ഥാനിയും കൂട്ടിക്കുഴച്ച് മലയാളത്തിന്‍റെ മാധുര്യമിത്തിരി പകരാന്‍ ശ്രമിച്ചപ്പോള്‍ അത് അദ്ദേഹത്തിലേയ്ക്കെത്തി എന്നതിന്‍റെ സാക്ഷ്യപത്രം ആ മുഖത്ത്‌ നിറഞ്ഞ പുഞ്ചിരിയും തൊഴുകൈകളും തന്നെയായിരുന്നു.

തുടര്‍ന്ന് ഉച്ചയ്ക്ക് തന്നെ നിരീക്ഷണങ്ങളുടെ അവലോകനമായിരുന്നു.  യോഗത്തില്‍ ഓരോരോ വ്യക്തികളായി സ്വാനുഭവം വിവരിക്കാന്‍ തുടങ്ങി. മൂന്നാമതായി എഴുന്നേറ്റ ഭൂട്ടാനി സാര്‍ ഗുണദോഷസമ്മിശ്രമായി കണക്ക് ക്ലാസുകളെ ആദ്യം വിലയിരുത്തി.  ഒടുവില്‍, മലയാളം എന്ന വാക്ക്‌ വികൃതമായി ഉച്ചരിച്ചു കൊണ്ട് അദ്ദേഹം പറഞ്ഞു, ” ഞാനൊരു ഗണിതാദ്ധ്യാപകനാണെങ്കിലും ജീവിതത്തിലാദ്യമായി ഒരു ദക്ഷിണേന്ത്യന്‍ ഭാഷ കേള്‍ക്കാനും ആസ്വദിക്കാനും ഇന്ന് അപൂര്‍വ്വഭാഗ്യമുണ്ടായി.  നാല്‍പ്പതു മിനിട്ട് നേരം ഒരു നിമിഷം പോലെ കടന്നു പോയ ആ ക്ലാസ്സില്‍ കുട്ടികള്‍ പഠിക്കുകയായിരുന്നില്ല, അദ്ധ്യാപകന്‍ പഠിപ്പിക്കുകയും ആയിരുന്നില്ല. അവര്‍ സുന്ദരമായ കവിത ആസ്വദിക്കുകയായിരുന്നു.  പ്രകൃതിയെ അറിയുകയായിരുന്നു.  അവരിലൊരാള്‍ ആയി മാറിയ ഈ ക്ലാസ്സ്‌ ഞാനും ഒരിക്കലും മറക്കില്ല”.

ഇതുകേട്ട് സഹാദ്ധ്യാപകരും പ്രിന്‍സിപ്പാളും ഉത്സാഹത്തോടെ എന്നെ നോക്കി കൈയ്യടിച്ചപ്പോള്‍ ഒരു നിമിഷം ഞാന്‍ എഴുന്നേറ്റു തൊഴുതു പോയി.  ഭാഷകള്‍ ക്കതീതമായ വികാരങ്ങള്‍ കൈമാറ്റം ചെയ്യാനാവുമെന്ന സത്യം കൂടുതല്‍ ഉറപ്പിച്ചു കൊണ്ട് വീണ്ടും..ഒരു ഇന്‍സ്പെക്ഷന്‍ കൂടി കടന്നു പോയി.

അനില്‍ നമ്പൂതിരിപ്പാട്

823 total views, no views today

വാസ ഗ്രഹം അങ്ങകലെ

'ചിത്രങ്ങള്‍: Kepler-452യും ഭൂമിയും. ഒരു താരതമ്യം - ചിത്രകാരഭാവന<br /><br /><br /><br />
കടപ്പാട് - NASA/JPL-Caltech/T. Pyle'
'Kepler - 186 (ഏറ്റവും മുകളില്‍), Kepler 452 (നടുക്ക്), സൗരയൂഥം എന്നീ നക്ഷത്രയൂഥങ്ങള്‍ - ഒരു താരതമ്യം. </p><br /><br /><br />
<p>കടപ്പാട് NASA Ames/JPL-CalTech/R. Hurt'

ഇന്റര്‍സ്റ്റെല്ലാര്‍ എന്ന സിനിമയില്‍ മനുഷ്യര്‍ക്കു വാസയോഗ്യമായ ഗ്രഹങ്ങളന്വേഷിച്ചുപോകുന്നവരെ കാണിക്കുന്നുണ്ട്. പ്രകാശവര്‍ഷങ്ങള്‍ക്കപ്പുറമാണ് അവര്‍ ഗ്രഹങ്ങളെത്തിരയുന്നത്. ഏതെങ്കിലും ഒരു ഗ്രഹം പോര, മറിച്ച് മനുഷ്യര്‍ക്ക് ജീവിക്കാന്‍ കഴിയുന്ന ഒരു ഗ്രഹം തന്നെ വേണം അവര്‍ക്ക്. എന്നാല്‍ അതത്ര എളുപ്പമല്ലതാനും. കാരണം ഒത്തിരിക്കാര്യങ്ങള്‍ ഒത്തിണങ്ങണം അത്തരമൊരു ഗ്രഹം ഉണ്ടാവണമെങ്കില്‍.
അതില്‍ ഏറ്റവും പ്രധാനം ഗ്രഹം, കേന്ദ്രനക്ഷത്രത്തില്‍നിന്നും ഒരു പ്രത്യേക അകലത്തില്‍ ആയിരിക്കണം എന്നുള്ളതാണ്. വാസയോഗ്യമായ അകലം എന്നാണ് ഇത് അറിയപ്പെടുന്നത്. ഭൂമി സൂര്യനോടടുത്തായിരുന്നെങ്കില്‍ അമിതമായ ചൂട് മൂലം ജലം ദ്രാവകരൂപത്തില്‍ ഇന്നത്തെപ്പോലെ നിലനില്‍ക്കില്ലായിരുന്നു. സൂര്യനില്‍നിന്നും വളരെ അകലെയായിരുന്നെങ്കില്‍ തണുത്തുറഞ്ഞ് ജലം ഐസായി മാത്രമേ കാണൂ. ഇതു രണ്ടും അല്ലാത്തതാണ് ഭൂമിയെ വാസയോഗ്യമായ ഗ്രഹമാക്കി മാറ്റുന്നത്. ഒരുപക്ഷേ അമിതമായ ചൂടിലോ അമിതമായ തണുപ്പിലോ ജീവിക്കാന്‍ കഴിയുന്ന മറ്റൊരു ജീവസമൂഹം ഉണ്ടായേക്കാം. പക്ഷേ നാമിപ്പോള്‍ തിരയുന്നത് മനുഷ്യര്‍ക്കും മറ്റു ജീവജാലങ്ങള്‍ക്കും കഴിയാന്‍ കഴിയുന്ന ഒരു ഗ്രഹത്തെയാണ്.

ദാ, അത്തരം ഒരു പ്രതീക്ഷ മനുഷ്യസമൂഹത്തിനു നല്‍കിക്കൊണ്ട് നാസയുടെ കെപ്ലര്‍ മിഷന്‍ ഒരു ഗ്രഹത്തെ ചൂണ്ടിക്കാണിച്ചിരിക്കുന്നു. Kepler-452b എന്ന പേരാണ് ഗ്രഹത്തിനു നല്‍കിയിരിക്കുന്നത്. Kepler-452 എന്ന പേരുള്ള നക്ഷത്രത്തെ ചുറ്റിക്കറങ്ങുന്ന ഗ്രഹം എന്നാണിതിന് അര്‍ത്ഥം. സൗരയൂഥസമാനമായ നക്ഷത്രവ്യൂഹങ്ങള്‍ കണ്ടെത്താനുള്ള ദൗത്യമാണ് കെപ്ലര്‍ ദൗത്യം. ആയിരത്തിലധികം ഗ്രഹങ്ങളെ ഇതിനകം കെപ്ലര്‍ കണ്ടെത്തിക്കഴിഞ്ഞു. 4600ലധികം കണ്ടെത്തലുകള്‍ സ്ഥിരീകരിക്കാനും കിടക്കുന്നു. സ്ഥിരീകരിച്ച ഗ്രഹങ്ങളില്‍ ഏറ്റവും പ്രാധാന്യമര്‍ഹിക്കുന്ന ഒരു കണ്ടെത്തലാണ് ഇപ്പോള്‍ പുറത്തുവന്നിരിക്കുന്നത്.
വാസയോഗ്യമായ അകലത്തില്‍ ഭൂമിയ്ക്കു സമാനമായ ഒരു ഗ്രഹം. ഭൂമിയേക്കാള്‍ 60% ത്തോളം വലിപ്പക്കൂടുതല്‍ ഈ ഗ്രഹത്തിനുണ്ട്. ഒരുപക്ഷേ ഗുരുത്വാകര്‍ഷണം ഭൂമിയേക്കാള്‍ കുറെക്കൂടി കൂടുതലായേക്കാം അവിടെ. ഗ്രഹത്തിന്റെ മാസും സാന്ദ്രതയും ഒക്കെ അറിഞ്ഞാലേ ഇക്കാര്യത്തില്‍ ഒരു തീരുമാനത്തിലെത്താന്‍ പറ്റൂ. അങ്ങനെയായാല്‍, ഒരിക്കല്‍ നാം അവിടെ എത്തിച്ചേരുകയാണെങ്കില്‍ അല്പം തല കുനിച്ചേ നമുക്കു നടക്കാനാകൂ. മനുഷ്യസമൂഹം ഒരിക്കല്‍ അവിടെ കുടിയേറിപ്പാര്‍ത്ത് ലക്ഷക്കണക്കിനു വര്‍ഷങ്ങള്‍ കഴിഞ്ഞാല്‍ ഉയരം കുറഞ്ഞ മനുഷ്യരായി ഒരു പക്ഷേ മാറിപ്പോകാനും ഇടയുണ്ട്!!!
സോഫ്റ്റ്‍വെയറുകള്‍ക്കും മറ്റും വേര്‍ഷന്‍ നല്‍കുന്നപോലെ Earth 2.0 എന്നു വേണമെങ്കിലും നമുക്കീ ഗ്രഹത്തെ വിളിക്കാം. ഭൂമി 365 വര്‍ഷം കൊണ്ട് സൂര്യനെ ചുറ്റിക്കറങ്ങുമ്പോള്‍ ഭൂമി 2.0ന് 385ദിവസങ്ങള്‍ വേണം മാതൃനക്ഷത്രത്തെ ഒരു തവണ ചുറ്റിക്കറങ്ങാന്‍.
Kepler-452 എന്ന മാതൃനക്ഷത്രവും സൂര്യനു സമാനമാണ്. സൂര്യനേക്കാള്‍ അല്പംകൂടി പ്രായമുണ്ട് ഈ നക്ഷത്രത്തിന്. 600കോടി വര്‍ഷങ്ങള്‍ കഴിഞ്ഞിരിക്കുന്നു ഈ നക്ഷത്രം ജനിച്ചിട്ട്. എങ്കിലും സൂര്യന്റെ അതേ താപനിലയിലാണ് നക്ഷത്രം. സൂര്യനേക്കാള്‍ 20% തെളിച്ചവും 10% വലിപ്പവും കൂടുതലാണ് Kepler-452ന്.

ഇനി ഈ ഗ്രഹത്തിലേക്ക് എത്തിച്ചേരാനുള്ള സാധ്യതകള്‍! സിഗ്നസ് എന്ന നക്ഷത്രരാശിയിയെ ഭൂമിയില്‍ നിന്നും നോക്കിയാല്‍ കാണാം. ഈ ഭാഗത്ത് ഏകദേശം 1400പ്രകാശവര്‍ഷങ്ങള്‍ അകലെയാണ് ഈ ഗ്രഹവും നക്ഷത്രവും! പ്രകാശവേഗത്തില്‍ സഞ്ചരിച്ചാല്‍പ്പോലും 1400വര്‍ഷം വേണ്ടിവരും അവിടെയെത്താന്‍. ഇന്റര്‍സ്റ്റെല്ലാറില്‍ കാണുന്നപോലെ വല്ല വേംഹോളും കണ്ടെത്തേണ്ടിവരും അവിടെയെത്താന്‍ എന്നു സാരം!
ഇപ്പോള്‍ കണ്ടെത്തിയപോലത്തെ (Kepler-452b) 12 ഗ്രഹങ്ങള്‍ ഇനിയും സ്ഥിരീകരണത്തിനായി കാത്തിരിക്കുന്നുണ്ട്. ഇതില്‍ ഒന്‍പ് ഗ്രഹങ്ങളും ചുറ്റുന്നത് സൂര്യനു സമാനമായ നക്ഷത്രങ്ങളെയുമാണ്. ഭൂമിയെപ്പോലുള്ള ഗ്രഹങ്ങള്‍ പ്രപഞ്ചത്തില്‍ ഒട്ടും വിരളമല്ല എന്നു തന്നെയാണ് ഈ കണ്ടെത്തലുകള്‍ സൂചിപ്പിക്കുന്നത്.

ഗ്രഹങ്ങളെ വേട്ടയാടാനുള്ള കെപ്ലര്‍ ദൗത്യത്തില്‍ നമുക്കും പങ്കാളികളാകാം. കെപ്ലര്‍ നല്‍കുന്ന ഡാറ്റ ഇന്റര്‍നെറ്റില്‍ ലഭ്യമാണ്. ഇതുപയോഗിച്ച് ഗ്രഹങ്ങളെ കണ്ടെത്താനുള്ള ഒരു സോഷ്യല്‍പ്രൊജക്റ്റ് തന്നെ നിലവിലുണ്ട്. http://www.planethunters.org/ എന്ന സൈറ്റില്‍ച്ചെന്നാല്‍ വീട്ടിലിരുന്ന്, ഏതാനും മൗസ് ക്ലിക്കുകളുടെ സഹായത്തോടെ ഗ്രഹവേട്ട ആരംഭിക്കാം!

 

744 total views, 1 views today

സംസ്ഥാന കടം നാല് കൊല്ലം കൊണ്ട് ഇരട്ടിയായി

2011 ജൂലൈ മാസത്തിൽ ധനകാര്യമന്ത്രി കെ.എം.മാണി നിയമസഭയിൽ അവതരിപ്പിച്ച, സംസ്ഥാന സർക്കാരിൻറെ സാന്പത്തിക സ്ഥിതി സംബന്ധിച്ച ധവളപത്രം അനുസരിച്ച് കേരളത്തിൻറെ കടം 78,673 കോടി രൂപയാണ്. അതായത് കേരളം രൂപീകൃതമായ 1956 മുതൽ2011 വരെയുളള 55 വർഷത്തെ ആകെ കടം. എന്നാൽ 2015 മാർച്ച് 31ലെ കണക്ക് പ്രകാരം ഇത് 1,53,757 കോടി രൂപയായി വർദ്ധിച്ചു. 75,084 കോടി രൂപയുടെ വർദ്ധനവ്. കൂടാതെ ഈ സാന്പത്തിക വർഷത്തിൻറെ ആരംഭത്തിൽ 1500 കോടി രൂപ കൂടി വായ്പ എടുത്തിട്ടുണ്ട്. 55 വർഷo കൊണ്ട് നമ്മുടെ സംസ്ഥാനത്തിന് ആകെയുണ്ടായ കടത്തിന് തുല്യമായ കടം കേവലം നാല് വർഷത്തെ ഭരണം കൊണ്ട് UDF സർക്കാർ വരൂത്തി വെച്ചു.ഈ കടത്തിന് നമ്മൾ നൽകേണ്ടി വരൂന്ന പലിശയുടെ കാര്യത്തിലും ഈ വർദ്ധനവ് പ്രകടമാണ്. 2010-11ൽ 5689.66 കോടി രൂപ ചെലവഴിച്ചിരൂന്ന സ്ഥാനത്ത് 10,952.10 കോടി രൂപയായി ഉയർന്നു. എൽഡിഎഫ് സർക്കാർ അധികാരം ഒഴിയുന്നതിന് തൊട്ട് മുന്പ് അതായത് 31-3-2011ൽ ഖജനാവിൽ 3881.94 കോടി രൂപ മിച്ചമുണ്ടായിരൂ ന്നു. യുഡിഎഫ് സർക്കാർ അധികാരമേറ്റ 18-5-2011ൽ 1963.47 കോടി രൂപ മിച്ചമുണ്ടായിരൂന്നുവെന്നും ധവളപത്രം പറയുന്നു. ഇതിൽ ധനകാര്യ മന്ത്രി അവകാശപ്പെട്ടിരൂന്ന മറ്റൊരൂ കാര്യം 2011-12ലെ 1.4% വരൂന്ന റവന്യൂ കമ്മി 2014-15 ആകുന്പോൾ പൂർണ്ണമായി ഇല്ലാതാക്കും എന്നാണ്. ഇപ്പോളത്തെ സ്ഥിതി 9.19% (7832.12 കോടി രൂപ) ആയി വർദ്ധിച്ചുവെന്നതാണ്.
2014-15ൽ വേറെ മൂന്ന് കാര്യങ്ങൾ കൂടി സംഭവിച്ചു. 1. രണ്ട് ഘട്ടങ്ങളിലായി 4002 കോടി രൂപയുടെ അധിക നികുതി ഏർപ്പെടുത്തി. 2. 13,700 കോടി രൂപ വൻപലിശക്ക്(9.64%) കടമെടുത്തു. 3. 31-3-2015ന് മുന്പ് കൊടുത്ത് തീർക്കേണ്ട സാന്പത്തിക ബാദ്ധ്യതകൾ (9416കോടി രൂപ) കൊടുത്തില്ല. അങ്ങനെ ഇൻഡ്യയിലാദ്യമായി കേരളത്തിൽ സാന്പത്തിക വർഷത്തിനും ബജറ്റിനും യാതൊരൂ പ്രസക്തിയും ഇല്ലാതായി.

എന്ത് കൊണ്ട് ഖജനാവിൻറെ സ്ഥിതി ഇത്ര മോശമായി…? ഈ കാലയളവിൽ അതിരൂക്ഷമായ വരൾച്ചയോ വെളളപ്പൊക്കമോ ഉണ്ടായിട്ടില്ല. ലോകസാഹചര്യങ്ങളും ഇൻഡ്യൻ സാഹചര്യങ്ങളും കേരളത്തിന് പൊതുവേ അനുകൂലമായിരൂന്നു. വിദേശമലയാളികളിൽ നിന്നുളള വരവിൽ കുറവുണ്ടായില്ലെന്ന് മാത്രമല്ല പുതിയ റെക്കോഡ് സ്ഥാപിക്കുകയും ചെയ്തു. ബാർ ലൈസൻസ് ഫീസ് ഇല്ലാതായെങ്കിലും ആ നഷ്തത്തെ കവച്ച് വെക്കുന്ന
രീതിയിൽ ബിവറേജ് ഔട്ട് ലെറ്റുകളിലെ വിൽപ്പന കൂടി. രൂപയുടെ മൂല്യം ഇടിഞ്ഞത് പോലും കേരളത്തിന് ഗുണകരമായി. മറ്റ് സംസ്ഥാനങ്ങളിൽ നിന്നുളള ചരക്ക് വരവിൽ കാര്യമായ വർദ്ധനവുണ്ടായി. വാഹനങ്ങളുടെയും സ്വർണ്ണത്തിൻറെയും വിൽപ്പനയിൽ കുതിച്ചുചാട്ടമുണ്ടായി. ഭരണമേറ്റെടുക്കുന്പോൾ ഒരൂ ശന്പളപരിഷ്കരണ ആനുകൂല്യം മുഴുവൻ കൊടുത്തു തീർത്തിട്ടും ട്രഷറിയിൽ മോശമല്ലാത്ത തുക ബാക്കിയുണ്ടായതും മറ്റൊരൂ അനുകൂലഘടകമായിരൂന്നു. ഒരൂ വർഷം മുന്പ് വരെ കേന്ദ്രത്തിൽ ഒരൂ കോൺഗ്രസ്സ് സർക്കാരാണ് ഉണ്ടായിരൂന്നത്. 01.7.14 മുതൽ പരിഷ്കരിക്കേണ്ട ജീവനക്കാരൂടെയും അദ്ധ്യാപകരൂടെയും ശന്പളം പരിഷ്കരിച്ചിട്ടില്ല. പൊതുവിതരണ സബ്സിഡി മുടങ്ങി. മാസങ്ങളായി സാമൂഹ്യക്ഷേമ പെൻഷനുകൾ കൊടുത്തിട്ട്. എന്തെങ്കിലും ഒരൂ പുതിയ വ്യവസായം കൊണ്ട് വന്നതായി ഗവണ്മെൻറ് പോലും അവകാശപ്പെടുമെന്ന് തോന്നുന്നില്ല. റോഡിൻറെ ഓട്ടയടച്ച കാശ് പോലും കോൺട്രാക്ടർമാർക്ക് കൊടുത്തിട്ടില്ല. റബറിൻറെ വിലത്തകർച്ച മാത്രമാണ് ഇല്കാലയളവിൽ ഉണ്ടായ ഒരൂ പ്രതികൂലഘടകം.

706 total views, no views today

ഫണ്ട് പരിമിതം : വിദ്യാലയ ഉച്ച ഭക്ഷണ പദ്ധതി താളം തെറ്റുന്നു.

 

ആസൂത്രണത്തിലെ പിഴവും ഫണ്ടിന്‍റെ അപര്യാപ്തതയും മൂലം  കേരളത്തിലെ പൊതു വിദ്യാലയങ്ങളില്‍ നടപ്പാക്കി വരുന്ന ഉച്ച ഭക്ഷണ പരിപാടി താളം തെറ്റുന്നു. മൂന്ന് വര്‍ഷം മുമ്പ് നടത്തിപ്പിലും ക്രമീകരണത്തിലും വ്യാപകമായ മാറ്റംവരുത്തിയാണ് ഇന്നത്തെ നിലയില്‍ ആക്കിയത്. കഞ്ഞിയും പയറും എന്ന വര്‍ഷങ്ങളായി തുടര്‍ന്നിരുന്ന രീതി മാറ്റി വൈവിധ്യമാര്‍ന്ന കറികളും ഭക്ഷണ രീതിയും ഏര്‍പ്പെടുത്താന്‍ സ്കൂള്‍ അധികൃതര്‍ക്ക് സ്വാതന്ത്ര്യം നല്‍കുന്ന രീതിയാണ് ആവിഷ്കരിച്ചത്. സിവില്‍സപ്ലൈസ്‌ വഴി അരി മാത്രം  വിതരണം  ചെയ്ത് മറ്റ് കാര്യങ്ങള്‍ക്കെല്ലാം തുക നല്‍കുന്ന രീതിയായി. കുട്ടിയൊന്നിനു ഒരു ദിവസത്തേക്ക് അഞ്ച് രൂപയാണ് ആദ്യം അനുവദിച്ചത്. വ്യാപകമായ എതിര്‍പ്പിനെ തുടര്‍ന്ന് നൂറ്റി അന്‍പതില്‍ താഴെ കുട്ടികള്‍ മാത്രമുള്ള സ്കൂളുകള്‍ക്ക് പാചക കൂലിയും കുട്ടി ഒന്നിന് അഞ്ച് രൂപയും മറ്റ് വിദ്യാലയങ്ങള്‍ക്ക് പാചക കൂലി ഉള്‍പ്പെടെ ആറു രൂപ വീതവും നല്‍കാന്‍ തീരുമാനമായി. അക്കാലത്തെ വില നിലവാരം അനുസരിച്ച് തുക ഒരു വിധം തികയുമായിരിന്നു. തുടര്‍ന്നുള്ള  വര്‍ഷങ്ങളില്‍ ഉച്ച ഭക്ഷണവുമായി ബന്ധപ്പെട്ട എല്ലാ ചെലവുകളും വന്‍ തോതില്‍ വര്‍ധിച്ചിട്ടും തുക മാറ്റമില്ലാതെ തുടരുന്നതാണ് സ്കൂള്‍ അധികൃതര്‍ക്ക് വിനയായത്.ഇക്കാലയളവില്‍ സര്‍ക്കാര്‍ തന്നെ കടത്ത് കൂലി,പാചക വാതകം ,പാല്‍,പാചക കൂലി എന്നിവയില്‍ വര്‍ധന വരുത്തി.പച്ചക്കറി പലവ്യഞ്ജനം എന്നിവക്കെല്ലാം പല മടങ്ങ്‌ വില കൂടി.എന്നിട്ടും സ്കൂളുകള്‍ക്കുള്ള കണ്ടിജന്‍സി തുക വര്‍ധിപ്പിച്ചില്ല.ഇപ്പോള്‍ വീണ്ടും പാചക കൂലി ഇരുന്നൂറു രൂപയില്‍ നിന്ന് മുന്നൂറ്റി അമ്പതു രൂപയായി വര്‍ധിപ്പിച്ചു.അഞ്ഞൂറിലധികം കുട്ടികള്‍ ഉള്ള സ്കൂളുകള്‍ രണ്ട് പാചക ക്കാര്‍ക്ക് നാനൂറ്റി അമ്പതു രൂപ വീതം നല്‍കണം. എല്ലായിനം ചെലവുകളും വര്‍ധിച്ചിട്ടും ഫണ്ട് വിഹിതം വര്ധിപ്പിക്കാത്തത്  സ്കൂളുകള്‍ക്ക് വന്‍ ബാധ്യത ഉണ്ടാക്കും. ആവശ്യമായ ഫണ്ട് പ്രാദേശികമായി സമാഹരിക്കാന്‍ സാധിക്കാത്ത സ്കൂളുകള്‍ ഭക്ഷണ മെനു പരിമിത പെടുത്തിയാണ് മുന്നോട്ട് പോകുന്നത്. കുട്ടികള്‍ക്ക് ലഭിക്കേണ്ട പാല്‍ മുട്ട എന്നിവയിലാണ് ആദ്യം വെട്ടിച്ചുരുക്കല്‍  വരുത്തിയത് .ഇനിയങ്ങോട്ട് കറികള്‍ പോലും നല്‍കാന്‍ കഴിയാത്ത സ്ഥിതി മിക്ക സ്കൂളുകള്‍ക്കും വന്നു ചേരും. ഏതു കാര്യവും വിവാദവും മാധ്യമ ശ്രദ്ധയും ആകര്‍ഷിക്കുന്ന നമ്മുടെ സംസ്ഥാനത്ത് പൊതു വിദ്യാലയങ്ങളിലെ എട്ടാം ക്ലാസ്സ് വരെയുള്ള കൊച്ചു കുട്ടികളുടെ പോഷകാഹാരത്തിന്റെ കാര്യത്തില്‍ യാതൊരുവിധ അനക്കവും ഒരു ഭാഗത്ത്‌ നിന്നും കാണുന്നില്ല.പരിപാടി നടത്തിപ്പിന്റെ പരിശോധനക്ക് കൂടുതല്‍ ഓഫീസര്‍ മാരെ നിയമിക്കുന്ന കാര്യത്തില്‍ കാട്ടിയ ശുഷ്കാന്തി പോലും കുട്ടികളുടെ ആഹാരകാര്യത്തില്‍ കാണുന്നില്ല.

ഉച്ച ഭക്ഷണ പരിപാടിയുടെ പ്രായോഗിക സാധ്യതകളും പ്രശ്നങ്ങളും നേരിട്ട് അറിയുന്നവര്‍ ഇക്കാര്യത്തില്‍ തീരുമാനം എടുക്കുന്ന ഒരു തലത്തിലും ഇല്ലാത്തത് പ്രശ്ന പരിഹാരം കാണുന്നതിന് തടസ്സം ഉണ്ടാക്കുന്നു.സ്കൂള്‍ ഉച്ച ഭക്ഷണ കമ്മറ്റി പോലെ ഉപജില്ല ജില്ലാ സംസ്ഥാന തലത്തില്‍ അധ്യാപകര്‍ക്കും രക്ഷിതാക്കള്‍ക്കും പ്രാതിനിധ്യമുള്ള സമിതികള്‍ കലാ കാലങ്ങളില്‍ നടത്തിപ്പും പ്രായോഗിക പ്രശ്നങ്ങളും വിലയിരുത്തുന്ന സംവിധാനം ഏര്‍പ്പെടുത്തുകയും പരിഹാര നിര്‍ദേശങ്ങള്‍ സര്‍ക്കാരിലേക്ക് സമര്‍പ്പിക്കുകയും വേണം.

പാചക കൂലി, കടത്ത് കയറ്റിറക്ക് വിറക് തുടങ്ങിയ സ്ഥിര സ്വഭാവമുള്ള ചെലവുകള്‍ക്ക്‌ കുട്ടികളുടെ എണ്ണത്തിനു ആനുപാതികമായി പ്രത്യേകമായി തുക നല്‍കുകയും പാല്‍ മുട്ട എന്നിവയ്ക്ക് കാലാകാലങ്ങളിലെ മാര്‍ക്കറ്റു വില നല്‍കുകയും പച്ചക്കറി പലവ്യഞ്ജനം എന്നിവയ്ക്ക് നിശ്ചിത തുക അനുവദിക്കുകയും ചെയ്‌താല്‍ മാത്രമേ ഫലപ്രദമായി പദ്ധതി നടപ്പിലാക്കാന്‍ പറ്റുകയുള്ളു.ഇങ്ങനെ നിശ്ചയിക്കുന്ന നിരക്ക് വര്‍ഷത്തില്‍ ഒരിക്കലെങ്കിലും വിലയിരുത്തി ആവശ്യമായ മാറ്റം വരുത്തണം.പോഷക സമൃദ്ധമായ കഞ്ഞിയും പയറും ഒഴിവാക്കി വൈവിധ്യം ഏര്‍പ്പെടുത്തിയത് ഉള്ളതും അവതാളത്തിലാക്കിയത് പോലെ ആയി.

738 total views, 1 views today

സ്കൂള്‍ രേഖകളില്‍ തിരുത്തല്‍ -നടപടികള്‍

സ്കൂള്‍ രേഖകളില്‍ തിരുത്തല്‍ -നടപടികള്‍

നിശ്ചിത ഫോറത്തില്‍ അപേക്ഷിക്കണം

ആവശ്യമായ ഫീസ്‌ അടക്കണം

അവശ്യമായ തെളിവുകളും സാക്ഷ്യപത്രങ്ങളും ഹാജരാക്കണം

തിരുത്താന്‍ അധികാരം

* ഒന്ന് മുതല്‍  പത്ത് വരെ പഠിക്കുന്ന  കുട്ടികള്‍ -സ്കൂള്‍ പ്രധാനാധ്യാപകന്‍

*എസ്.എസ് എല്‍.സി. സര്‍ടിഫിക്കറ്റ് ലഭിച്ചവര്‍ -പരീക്ഷാ സെക്രട്ടറി

*എസ്.എസ് എല്‍.സി. സര്‍ടിഫിക്കറ്റ് ലഭിക്കാത്തവര്‍- ബന്ധപെട്ട എ.ഇ.ഒ /ഡി.ഇ.ഒ.

വിശദ  വിവരങ്ങളും അപേക്ഷാഫോറങ്ങളും ഡൌണ്‍ലോഡ്സ് പേജില്‍

688 total views, no views today